"أوصيك يا بنى بالقمر والزهور
أوصيك بليل القاهرة المسحور"
يا صلاح جاهين يا عمى وعم الكل
العيشة مرار وأقرب للذل
وانت بتقول قمر وزهور
ويمكن عايزنا نشترى فل
مش اجدع طبق الكشرى ولا الفول
وقال أيه .. ليل القاهرة مسحور
###
ده لولا انى عارفك كنت قلت كتكوت مغرور
ولو معرفش أسمك كنت هسميك فرفور
بس أنت صلاح جاهين
يعني "كلمة سلام" و "موال عشان القنال"
و"الليلة الكبيرة" و"القاهرة في ألف عام"
بس _أعذرنى_ ومع فائق الحب والاحترام
ومن غير ما نبوظ _النبي حارصه_ السلام
مش داخلة دماغي حكاية الزهور!
###
طب انا راضي ضميرك يا عم صلاح
لو في جيبي 20 جنيه ..
وفي وسط البلد هايم سواح
اتعشي واشرب شاى بحليب على قهوة البستان؟
ولا أدخل فيلم اسمه مرجان أحمد مرجان؟
ولا أخدها من قصيرها وع البيت دوران؟
ايه؟ برضة! طيب حاضر
هشترى عقد فل لأى سمراء
0 comments:
Post a Comment